ذات الدين

ذات الدين انا المحتشمه بى توب العفاف مكسيه
لما يقولــو ست الحشمه اعرف انــى سودانيه
ورده وسط جناين المنقه بى عبق الزهر مرويه
منيه من القدر مسروقه من وسط الجنان حوريه
شايله من الصباح اشراقو نسمه من العصارى نديه
ماخده جميل خصال الريف ومن طبع المدينه شويه
بدفع نفسى لى ودبلدى واهدى ليهو عمرى هديه
دونو يروحو روحى وعينى افدى واموت فداهو ضحيه
اهدى ليهو كل ماعندى افدى انا بى سواد عينىّ
وكت الشده عون يلقانى فى وكت الدعابه بنيه
ببقى انا امو وكت الوجعه اوسدو بى حنان ايدىّ
وابقى انيستو ساعة الهجعه فى سود الليالى اخيه
نافره متل ارايل حلفا فى لكنة لسان شايقيه
شايله من الشجاعه مهيره من عز البطاحين ريّا
حلوه متل حسان توتيل وزى غانيات جنوبنا ابيه
ماخده قوام بنات سولارا من ظبيان نيالا ظبيه
من المال لو ابقى فقيره بالخلق الاصيله غنيه
واجمل مايزين اخلاقى انى انا بارّه بى والدىّ.